اللي حصل النهارده شئ غريب جدا
اللي حصل ان بعض الشباب طالعين في مسيره متوجهين ناحية مجلس الشعب
مسيره سلميه جدا وكل غرضهم يعبروا علي رأيهم ويؤكدوا مطلب سرعة تسليم السلطه ومنهم من كان بيطالب بتسليم السلطه ل مجلس الشعب
مجلس الشعب اللي اغلب نوابه من الاخوان او حزب الحريه والعداله وبردو
رئيس المجلس اخواني
واثناء المسيره المتوجه للبرلمان يفاجئ الجميع ببعض شباب الاخوان عاملين
حاجز امني عشان يمنعوا الثوار من الدخول ناحية المجلس
طيب هما ليه عملوا كده ؟ انا نفسي اعرف
دي مسيره سلميه جدا وغرضها معروف وهو سرعة تسليم السلطه يعني لا فيه تخريب ولا اي حاجة
يعني الشباب الثوري عاوز يسلم السلطه لرئيس مجلس الشعب الاخواني
وشباب الاخوان بيمنعوهم
طيب بلاش ليه عملوا كده
بصففتهم ايه يعملوا كده ؟
هما ( شباب الاخوان ) لا شرطه ولا جيش واظن ان حماية المؤسسات
دي مهمة الشرطة والجيش وكانوا متواجدين وقتها ولم يمنعوا الثوار من الدخول
طيب ولو فعلا غرضم تأمين المجلس ومنع التخريب .... الخ
كانوا فين هما وقت احداث شارع محمد محمود ومجلس الوزاء
كانوا فين وقت حريق المجمع العلمي
ليه معملوش شرطة اخوانيه اوجيش اخواني وقتها عشان يمنعوا حريق المجمع العلمي
طيب وفين قادة الاخوان من اللي حصل ده
وقت ما كان ده حاصل كان فيه جلسه لمجلس الشعب وخرج بعض النواب للتضامن مع الشباب اللي واقف برا وبلغوا قادة الاخوان باللي حاصل برا ومحدش اتحرك
ولا حد عمل حاجة ولا حد حاول يمنع شباب الاخوان من اللي بيعملوا ده .
شباب الاخوان كانوا بستخدموا صواعق كهربائية وعصي عشان يمنعوا الشباب من التقدم
يعني الاخوان عملوا من نفسهم شرطه اوسخ من الشرطه ايام مبارك علي الشعب
لا بصراحه شئ جميل ويطمن خاااااااااااااالص
طيب لو كان الامن المركزي كان حاول يمنع المتظاهرين كنا قولنا معلش اصل وزير الداخليه جوا البرلمان هو و الجنزوري وخايفين عليهم اما يطلعوا احسن حد يضربهم او يقلهم كلمه مش تعجبهم
ده مثلا يعني
طيب وشباب الاخوان يمنعوا ليه المتظاهرين من الدخول وبصفتهم ايه
هو خلاص علشان بقيوا اغلبيه في البرلمان فاكرين مجلس الشعب ده بقي بتاعهم مثلا
يلا ادينا مستنين يمكن حد من الارشاد يطلع يفهمنا اللي حصل
او يطلعوا بيان يقوللنا فيه رصيدنا لديكم يسمح !!
ليست هناك تعليقات:
إرسال تعليق